Спомен-биста на истакнатиот поет од Унгарија Шандор Петефи ќе се гради во Струга, со заедничка заложба на унгарскиот амбасадор во Република Македонија Јожеф Бенце и градоначалникот Зијадин Села.
На денешната средба во Општина Струга, амбасадорот Бенце и градоначалникот Села изразија уверување дека спомен-бистата ќе биде поставена колку што е можно поскоро, во пресрет на новото издание на поетскиот фестивал „Струшки вечери на поезијата“.
– На струшката поетска манифестација позната во целиот свет учествувале многу унгарски поети, а двајца од нив се закитиле и со наградата „Златен венец“, истакна унгарскиот амбасадор.
Според струшкиот градоначалник, подигнувањето на спомен-бистата, ќе придонесе за уште поголема афирмација на Струшките вечери на поезијата.
– Ваква иницијатива и барање било доставено до Општината во текот на минатата година од страна на фестивалот Струшки вечери на поезијата, но за жал, до денес не е донесена одлука за да се постави бистата. Му ветив на амбасадорот дека ќе направам се што е во моја можност, а ќе разговарам и со советниците оваа биста да биде ставена во Струга, рече Села.
Унгарската амбасада во Македонија, преку Струшките вечери на поезијата уште во текот на минатата година покрена иницијатива за поставување спомен-обележје за поетот Петефи.
Првиот човек на Општина Струга денеска ја прифати и понудата на неговиот висок унгарски гостин Јожев Бенце, градот да се збратими со општина во Република Унгарија.