Стефан Миноски е новиот претседател на Либерално-демократската младина, избран едногласно на последното Изборно собрание. Миноски досега ја извршуваше функцијата генерален секретар на подмладокот во два мандати и доаѓа на местото на Бобан Јанкоски.
Новиот претседател на младите либерал-демократи се заложи за зацврстување на улогата на младите, како во рамките на партијата, така и во самото општество, а вети и зајакнување и омасовување на ЛиДеМ.
„Ние младите, можеме најмногу да придонесеме да го промениме ова што ни се случува, тоа го докажаа студентите. Ние што размислуваме со сопствените глави и што горко ја чувствуваме суровата реалност, не ги купуваме ефтините приказни на еден началник Латас, правејќи ја Македонија налик на Шведска. Се смееме на изјавите на нашиот претседател Иванов, кога вели дека младите остануваат поради нашата економија“, рече Миноски.
На Собранието зборуваше и претседателот на ЛДП, Горан Милевски, кој упати силни критики кон актуелната политичка состојба во државата, ставајќи акцент на масовното иселување на младите .
„Убеден сум дека младите ќе го имаат решавачкиот збор во процесот на промена на власта во државата. Младите ќе ја казнат неодговорната политика на Владата, која е единствениот виновник што денес младите перспективата ја бараат надвор од границите на Македонија“, појасни претседателот на ЛДП, Горан Милевски.
Собранието го избра и новиот Централен и Надзорен одбор на подмладокот, а за нов генерален секретар на ЛиДеМ е поставен Стефан Спасиќ.
