Министерот за финансии Зоран Ставрески утре и задутре ќе копретседава со шестата меѓувладина македонско-руска комисија за трговско-економска и научно техничка соработка која се одржува во Нижниј Новгород, Русија.
Комисијата ќе расправа за секторот енергетика, напредокот во преговорите за приклучување на Македонија кон „Јужен тек“ и порамнувањето на клириншкиот долг со Русија преку проектот „Гасификација на РМ“.
Според Министерството за финансии, на Комисијата ќе бидат разгледани и правците и перспективите за развојот на трговско-економската соработка меѓу Република Македонија и Руската Федерација, како и соработката во индустријата, транспортот, земјоделството, образованието, науката и туризмот.
Копретседавач на Меѓувладината комисија од руска страна е заменик-министерот за регионален развој на Руската Федерација Максим Травников.