Во албанскиот град Поградец од задутре стартува имплементацијата на Проектот за интегрално управување со природното и културното наследство на регионот на Охридското Езеро, финанасиран од ЕУ и УНЕСКО.
Според предвидениот протокол, имплементацијата ќе почне со работилница во Поградец, на која од македонска страна ќе учествуваат преставници на Министерствата за животна средина и просторно планирање и за култура, на „Завод и музеј – Охрид“ и на општините Охрид, Струга и Дебрца.
Самиот проект е осмислен и дизајниран да ги посочи главните критични точки околу заштитата на природното и културното наследство во регионот. Исто така, да ја зајакне прекуграничната соработка во односната област, да ги зајкне капацитeтите за заедничко управување и да поддржи интегрирано управување и прекугранична секторска соработка. Конечната цел е и албанската страна од Охридското Езеро да биде ставена под заштита на УНЕСКО.
Проектот е планирано да трае 36 месеци, да чини 1,7 милиони евра и да се спроведе под координација на ЕУ-УНЕСКО а преку Министерствата за животна средина и за култура на Македонија и Албанија.
Во осмислувањето на проектот активно партиципираше Билатералниот секретаријат за Охридското Езеро, телото што ќе биде токму задолжено и за координацијата и негова имплементација.
Македонскиот претставник во Билатералниот секретаријат, Дејан Пановски, укажа на исклучителната важност на проектот, од кој се очекува значајно да придонесе за заштита, правилно управување и валоризација на културните вредности и историското наследство во регионот на Охридското Езеро.
– Самиот проект е исклучително важен и со него се очекува да се излезе со ревидирана инвентаризација на наследството во регионот, со стратегија за развивање на софт-туризам базиран на културните и природните вредности, но и да се интервенира со пилот-мерки во односот кон отпадот. Ако на крај се успее и албанската страна на Езерото да добие статус и обврски кон УНЕСКО, што е главната цел и во што не се сомневам, тогаш сме создале реални услови за долгорочна интегрална заштита на вредностите, изјави Пановски.
Тој оцени дека проектот е силно конципиран кон интегралноста на мерките и се случува временски во еден исклучително важен момент за Езерото и за заштитата на природно и културно наследство околу него.