Во организација на Националната мрежа против насилство врз жени и семејно насилство и Здружението на еднородителски семејства „Една Може“ денеска ќе се одржи Регионална средба за кандидати за градоначалници и носители на советнички листи за Полошкиот регион, на која ќе биде претставена потребата од преземање конкретни мерки на локално ниво и обезбедување на средства од локалната самоуправа за унапредување на пристапот до сервиси за жените и децата жртви на насилство.
– За таа цел, од кандидатите за градоначалници очекуваме да потпишат Јавна заложба за унапредување на заштитата на жените и децата жртви на различни форми на насилство, вклучително и семејно насилство, се вели во соопштението од организаторите.
Во него се потсетува дека на иницијатива на Националната мрежа, на 25 ноември минатата година лидерите на 17 политички партии потпишале Заедничка декларација за спречување и борба против насилство врз жените.
Покрај оваа средба, треба да се одржат уште две регионални средби на кандидати за градоначалници и носители на советнички листи, во скопскиот и вардарскиот регион.