Претседателот на Владата на Република Македонија, Зоран Заев, придружуван од министерот за надворешни работи Никола Димитров се сретна со Фам Бин Мин, заменик премиерот на Социјалистичка Република Виетнам.
На средбата се потврдени традиционално добрите и стабилни политички односи меѓу двете земји и оценето е дека постои можност за нивно натамошно унапредување.
Договорено е соработката да биде продлабочена на економски план, со вклучување на бизнис заедниците на двете земји. Констатирано е дека СР Виетнам со своите 90 милиони жители е атрактивен нов потенцијален пазар за извоз на Македонија, а Република Македонија со својата географска позиција, блискоста до ЕУ и отворените перспективи на членство во ЕУ е атрактивна дестинација за странски инвестиции од Виетнам.
-Иднината на Република Македонија е во ЕУ и НАТО, но заинтересирани сме да соработуваме со сите земји и да градиме партнерства со државите пријатели на Македонија, за да го унапредиме нашиот економски развој и да отвориме нови работни места за граѓаните на Република Македонија, рече премиерот Заев.
„Република Македонија е интересна земја за СР Виетнам. Сакаме да ја зголемиме економската соработка, како и да ги развиеме односите меѓу двете држави, рече заменик премиерот на Виетнам, Фан Бин Мин.
Заменик премиерот на Виетнам, Фан Бин Мин најави можност за понуда на стипендии за образование за студенти од Македонија.
На средбата беа искажани покани за обострани посети на делегации на двете земји, на највисоко политичко ниво, или министерски посети, со цел да се унапредат економската соработка, трговската размена и областите од важност за подобрување на животот на граѓаните на двете држави.