Претседателот на СДСМ, Зоран Заев денеска оствари работна средба со амбасадорот на Сојузна Република Германија, Гудрун Штајнакер.
На средбата, информира СДСМ, се разговарало за повеќе актуелни теми поврзани со економската состојба во државата и напредокот на земјата во евроинтеграцискиот процес.
Разговарајќи околу позициите на Македонија на претстојниот Самит на ЕУ и очекувањата од него, Заев акцентирал дека СДСМ очекува конечно приближување на земјата кон Унијата.
Во таа насока, посочил дека СДСМ ќе продолжи со позитивниот однос кон евроатланските интеграции на Македонија и ќе врши силен притисок врз Владата за спроведување на сите неопходни реформи за членство на земјата во ЕУ и НАТО.
Заев ја запознал амбасадорката Штајнакер со генералните планови на новото раководство на партијата и визијата во која насока треба да се движи СДСМ во иднина.