Досегашната реализација на обврските од Договорот постигнат меѓу четирите партии во Пржино за излез од кризата, како и претстојните обврски во наредниот период, биле главна тема на денешната средба на тројцата европратеници Ричард Ховит, Едвард Кукан и Иво Вајгел со претставници на ВМРО-ДПМНЕ.
Како што соопшти владејачката партија, Никола Тодоров на Вајгл, Ховит и Кукан им укажал дека сите обврски кои ги презеде ВМРО-ДПМНЕ, беа почитувани.
На меѓународните претставници им биле пренесени очекувањата Договорот да биде до крај реализиран, вклучувајќи го и клучниот услов, изборите на 24 април.
– Одржувањето на изборите во предвидениот датум ќе значи и целосно заокружување на Договорот и излез од кризата. Ваквиот исход го очекуваат и потписниците на договорот и меѓународните претставници, а пред се граѓаните на Република Македонија. Секој обид да се изигра овој услов го доведува во прашање целокупниот договор и се што е досега постигнато, стои во соопштението на ВМРО-ДПМНЕ.
На средбата, на тројцата европратеници им било укажано и на, како што наведува ВМРО-ДПМНЕ, незаконските разрешувања изминатиов период од технички именуваните министри и заменици на СДСМ, почнувајќи од жестоката партизација со непрофесионален кадар, преку незаконските одлуки и разрешувања, па се до унапредувањето на сопругот на министерката Фросина Ременски со кое беше нарушен системот на кариера кој МВР заедно со меѓународни експерти го градеше со години.