Можностите за воспоставување дијалог помеѓу власта и опозицијата, европските перспективи на Македонија и новата Стратегија на СДСМ беа клучните теми на разговор помеѓу претседателот на СДСМ, Зоран Заев и генералниот секретар, Оливер Спасовски со амбасадорот на ЕУ во Република Македонија, Аиво Орав.
СДСМ е определена кон изнаоѓање решенија што ќе гарантираат враќање на демократските процеси во Македонија, изразување на слободната волја на граѓаните и обезбедување услови за фер избори, рече претседателот Заев.
Претседателот Заев го соопшти ставот на СДСМ за опстојување на петте барања на СДСМ, меѓу коишто клучно е обезбедувањето гаранции за практична имплементација на евентуалниот договор, што е познато и на ВМРО-ДПМНЕ и на јавноста во Македонија.
Во однос на евро-перспективите на земјава, претседателот Заев рече дека СДСМ останува посветена на препораката за почеток на преговорите со Европската Унија во овогодинешниот Извештај.
На средбата стана збор и за новата Стратегија на СДСМ, чијашто цел се исклучиво граѓаните на Република Македонија и создавањето услови за достоинствен живот за сите во државата.