Македонија има сериозен предизвик со организирање на фер и демократски избори, а проблемите се повторуваат постојано, беше констатацијата на средбата помеѓу претседателот на СДСМ, Зоран Заев и делегацијата на ОБСЕ/ОДИХР, предводена од амбасадорот Герт Хинрих Аренс, шеф на набљудувачката мисија за локалните избори 2013 година.
На средбата се разговараше за нецелосната имплементација на препораките на ОБСЕ/ОДИХР во Изборниот Законик, а се осврна внимание и на нерегуларностите на локалните избори, особено на увезените гласачи од Пустец, заплашување на гласачите, злоупотреба на државни институции и сл.
Амбасадорот Аренс истакна дека најважна е политичката волја од сите политички субјекти во земјава да се следат и целосно да се имплементираат препораките на ОБСЕ/ОДИХР и дека за добивање добра правна рамка за Изборниот Законик од суштинска важност е сите препораки да бидат имплементирани.
Членовите на делегацијата на ОБСЕ/ОДИХР нагласија дека мора да постои јасна поделба помеѓу ингеренциите на партијата на власт и државните институции, бидејќи само така може да се отстранат можностите за злоупотреба на власта. Делегацијата на СДСМ истакна дека нема приоритетни препораки, туку дека сите препораки претставуваат приоритети.
