Министерот за одбрана на Република Македонија, Талат Џафери денеска оствари средба со амбасадорот на Република Грција во Република Македонија, Харис Лалакос.
На средбата, соопшти денеска МО, Џафери и Лалакос размениле мислења за досегашната соработка помеѓу двете земји во областа на одбраната и безбедноста и можностите за нејзино интензивирање, како основа за развој на добрососедски односи.
Министерот Џафери посочил дека Министерството за одбрана е отворено кон одржување и унапредување на одбранбената соработка со Република Грција. Тој нагласил дека отворените прашања помеѓу двете земји не треба да претставуваат пречка за реализацијата на средби и контакти помеѓу високи официјални лица од двете министерства и армии.
Основа за билатералната соработка помеѓу Република Македонија и Република Грција претставува Договорот за воена соработка потпишан во 1999 година, додека реализацијата се врши врз основа на Планот за билатерална соработка кој се потпишува секоја година.
