Министерот за одбрана на Република Македонија, Талат Џафери, денеска имаше одвоени средби со амбасадорите на Република Турција, Гурол Сокменсуер и на Република Италија, Фабио Кристијани.
Заедничка била констатацијата на министерот Џафери и амбасадорот Сокменсуер дека односите на Република Македонија и Република Турција, особено во областа на одбраната, рефлектираат исклучително меѓусебно почитување, пријателство и развиена соработка. На средбата министерот Џафери се заблагодарил и за континуираната поддршка на Република Турција во процесот на евроатлантско интегрирање на Република Македонија, а упати и честитки по повод 13. март, денот кога се одбележува 114-годишнината од дипломирањето на Мустафа Кемал Ататурк на Воената гимназија во Битола.
Блиската меѓусебна соработка со Република Турција, соопшти денеска МО, се огледува во фактот дека првата Спогодба за соработка од 1994 година беше потпишана токму со Турција, од каде беше испратено и првото воено аташе во Република Македонија.
Продлабочување на меѓусебната соработка, како и поддршката за интегрирање на Република Македонија во евроатлантските структури, биле темите на кои разговарале министерот Џафери и амбасадорот на Република Италија, Фабио Кристијани.
Основа за билатералната соработка во областа на одбраната помеѓу двете земји, стои во соопштението од МО, претставува Спогодбата за билатерална воена соработка од 1997 година, односно Планот за билатерална соработка за 2013 година која вклучува јазична обука, школувања и слично.
Амбасадорите на Турција и на Италија, честитајќи му го изборот за министерот за одбрана, му посакаа на Џафери успех во понатамошното спроведување на напорите за развој и реформи во областа на одбраната и на безбедноста.