Претседателот на Демократската унија за интеграција Али Ахмети во рамки на неговата посета на Приштина денеска се сретна со премиерот на Косово, Иса Мустафа со кого разговараше за актуелната политичка ситуација во Косово и Македонија и за соработката меѓу двете земји.
Премиерот Мустафа го запознал Ахмети со напредокот што го има постигнато Косово, истакнувајќи ја посветеноста на косовската влада за евроинтеграциските процеси и за продлабочување на соработката со земјите во регионот.
Во тој контекст премиерот ја оценил важноста од заедничкото организирање на средбата меѓу владите на Македонија и на Косово што се очекува да се одржи во текот на мај.
Ахмети, како што соопшти ДУИ, изразил подготвеност да помогне во зајакнување на соработката меѓу двете земји, истакнувајќи го во тој контекст и организирањето на заедничката средба меѓу двете влади.
