Во седиштето на Демократската Унија за Интеграција во Тетово (ДУИ), претседателот Али Ахмети, имаше средба со амбасадорот на Косово во Македонија, Илбер Хуса.
Ахмети и Хуса, како што соопшти ДУИ, разговарале за последната состојба помеѓу Косово и Македонија, за политичката ситуација во двете земји и во регионот, како и за евроатлантската интеграција.
Заедничка била оценката дека двете земји треба да ги развијат билатералните односи со меѓусебно разбирање и заемна помош во сите полиња, економски и политички.
Претседателот на ДУИ Ахмети нагласил дека постојаниот дијалог помеѓу Косово и Македонија е најдобра превентива за надминување на сите недоразбирања и во таа насока предложил формирање заедничка комисија за да се менаџираат сите прашања и да се унапреди дијалогот и соработката меѓу двете земји.
Принципот на добрососедство, за Ахмети и Хуса, е многу значаен и двете земји, стои во соопштението, треба да направат максимални напори за меѓусебно зближување и реализирање на реформите кои што се потребни за евроатлантска интеграција.
Ахмети и Хуса разговарале и за последните политички случувања во земјава, при што лидерот на ДУИ ги нагласил напорите на партијата за постигнување компромисно решение за прашањето со името помеѓу Македонија и Грција.