Шефот на дипломатијата Никола Димитров објави на својот Фејсбук профил дека вчера за време на работната посета на Грција, во Атина имал средба со неговиот грчки колега Никос Дендиас.
-Разговаравме за добрите билатерални односи и можноста да ја исполниме новата страница на пријателство со конкретни проекти од заеднички интерес. Зборувавме и за нашата ЕУ иднина, актуелните прашања во регионот и во светот, со акцент на пандемијата и како да се справиме со предизвиците со кои сите се соочуваме, напиша Димитров.
За средбата се огласи на Твитер и шефот на грчката дипломатија, кој напиша дека со Димитров разговарале за соработката меѓу двете земји во борбата против Ковид-19, актуелните состојби во регионот, а при тоа му честитал и за изборот на пратеник во Собранието.