Во седиштето на Демократската унија за интеграција во Тетово, денеска лидерот на партијата Али Ахмети се сретна со новоименуваната хрватска амбасадорка во Македонија, Даниела Баришиќ.
Како што соопшти денеска ДУИ, Ахмети и хрватската амбасадорка разговарале околу актуелните политички случувања во Македонија, договорот од 2 јуни и преговорите на работните групи, како и за меѓуетничките односи.
Лидерот на ДУИ оценил дека спроведувањето на договорот значи пристап на земјата кон евро-атлантските стандарди и враќање на политичката и институционалната стабилност.
Тој ги претставил ставовите на партијата во врска со специјалниот обвинител, како и потребата за, како што посочил, законско регулирање на прислушкуваните разговори со цел да се гарантираат фер и еднакви услови за сите учесници во политичкиот процес.
Партиите, смета Ахмети, треба да ги надминат разликите за сепцијалниот обвинител што е можно поскоро и да продолжат со работа во насока на спроведувањето на другите точки на договорот.