Царинските службеници на аеродромот „Александар Велики“ спречија обид за нелегално внесување 30 илјади швајцарски франци.
Парите, како што информираат од Царинската управа, биле откриени кај македонски државјанин од село Бојане, општина Сарај кој вчера околу 20 часот пристигнал во земјава со лет од Мулхоус.
– Тој се определил за зелениот канал каде поминуваат патници кои немаат ништо за пријавување за царинска контрола. Лицето е селектирано за царинска контрола, при што во внатрешниот џеб од сакото, царинските службенци пронајдоа вкупно 42 илјади швајцарски франци. Согласно законот за девизно работење, резиденти можат слободно да внесат девизни средства во противвредност од 10 илјади евра, а износ над овој мора да биде пријавен на Царина. на сопственикот му се вратени 12 илјади швајцарски франци, додека 30 илјади франци се одземени, соопшти Царинската управа.
Против прекршителот е покрената прекршочна постапка за сторен девизен прекршок.