Холандски планинари кои попладнево се загубија во шумите на Баба Планина, вечерва околу 20 часот се најдени и згрижени од специјален тим на Дирекцијата за заштита и спасување (ДЗС), регионално одделение во Битола.
Димче Јошевски, раководител на регионалната канцеларија на ДЗС во Битола, во изјава за МИА потврди дека холандските планинари се пронајдени, згрижени и сместени да преноќат во планинарскиот дом на Големо Езеро.
– Станува збор за маж и жена на возраст од 35 години кои утрото тргнале кон двете езера на врвот на планината, познатите Пелистерски очи. Најверојатно од непознавање на патеката во еден момент се изгубиле, но добро е што телефонски пријавија дека имаат проблеми во шумите на планинната. По брза интервенција на петчлен тим за спасување во планина избран од ДЗС, туристите планинари од Холандија ги пронајдовме во месноста Козји Камен, изјави Јошевски.
Холандските туристи кои ги користат можностите што Битола ги нуди за селско-планински туризам во едно од битолските села вечерва ќе преноќат во планинарскиот дом на Големо Езеро, а утре со придружба ќе се вратат во селото каде што се сместени, информираа од регионалната канцеларија на Дирекцијата за заштита и спасување во Битола.