Советниците на ВМРО-ДПМНЕ во Советот на општина Тетово денеска со прес-конференција пред претоварната станица за отпад во Тетово побараа од градоначалничката на општината Теута Арифи да ги исполни ветувањата за решавање на проблемот со сметот во градот.
Тие најавија дека доколку градоначалничката Арифи не се зафати веднаш со решавањето на овој и другите проблеми настанати со нејзиното несериозно работење тие како советничка група на ВМРО-ДПМНЕ нема да и ја даваат своја подршка за работа во Советот на општината.
– Ветивте дека ќе го решите конечно проблемот со отпадот и што е штетн по здравјето на граѓаните на град Тетово. Исто така ветивте дека ќе изградите и објект со кој ќе се рециклира отпадот но за жал и тоа е едно од многуте ваши ветувања што до сега не ги реализиравте. Општинскиот комитет на ВМРО ДПМНЕ Тетово во многу наврати апелираше до Вас градоначалничке Теута Арифи, до надлежните општински служби како и до ЈКП Тетово но од страна на истите не наидовме на разбирање и желба за решавање на овој горчлив проблем што ги засега сите граѓани на Тетово и пошироко, изјави советникот Ненад Спасовски.
Од локалната власт информираа дека има повеќе смет на претоварната станица бидејќи процедурата за транспорт на сметот кон депонијата Дрисла е покомплицирана, а поради празниците има и поголема количина на смет од вообичаените 120 тони што се собираат во градот во текот на едно деноноќие.