Сојузот на здруженија на пензионерите на Македонија изрази благодарност до Собранието за изгласувањето на Буџетот за 2013 година и за дополнувањето на Законот за пензиско и инвалидско осигурување со кој се предвидува линеарно зголемување на пензиите за пет проценти од март идната година.
– Се работи за едно исклучително сензибилно прашање кое ги засегаше луѓето од третото доба, за што изминатиот период изразивме голема загриженост имајќи ги предвид актуелните политички случувања, соопшти Сојузот.
Сојузот на здруженија на пензионерите на Македонија во кој членуваат повеќе од 280.000 пензионери во земјава делува како самостојна, невладина и неполитичка организација, која во континуитет се развива, оставајќи траги и во самиот развој на државата, како што е наведено во соопштението, и понатаму останува категоричен во ставот дека кога станува збор за пензионерските прашања, особено оние што се поврзани со егзистенцијата на оваа голема популација, сите политички фактори треба да имаат заеднички јазик и единствен став, бидејќи тоа се прашања, пред се во интерес на државата.