Советот на Град Скопје денеска на седница ја разреши советничката на СДСМ, Софија Куновска, со образложение дека нејзината функција во Советот не е споива со пратеничката функција која ја доби на парламентарните избори.
Оваа одлука следи по верифицирањето на пратеничките мандати во Собранието. По одлуката на Советот, Куновска изјави дека советниците на ВМРО-ДПМНЕ покажувале нескриено задоволство што ќе се ослободат од неа.
– Денес сум разрешена од местото член на Совет на Град Скопје под раководна палка на Ирена Мишева која и самата беше шест месеци во слична ситуација, неспоивост на функција, затоа што по изборот на член на градскиот Совет уште најмалку шест месеци остана да биде член на Фондот за пензиско и инвалдиско осигурување. Но тоа не е единствен таков случај во Град Скопје. Таков беше и случајот со Халиде Палиште од ДУИ, која беше во исто време и член на Советот и директор на Национална галерија, рече Куновска.
Куновска е четврта советничка на СДСМ која го загуби своето место поради одлуката на Собранието со која беа игнорирани нотарските изјави на избраните пратеници. Претходно од Советот на Охрид од истите причини беше разрешен, Томислав Тунтев, а вчера од битолскиот совет беа разрешени советниците од редовите на СДСМ, Васко Ковачевски и Јулијана Силјановска.
