Собранието на Република Македонија доцна вечерва со 80 гласа „за“ ја донесе одлуката за пристапување кон измена на Уставот заради имплементација на Договорот од Преспа.
На барање на Драган Данев од ВМРО-ДПМНЕ, гласањето се вршеше поединечно со именување и јавно гласање на пратениците.
Од коалицијата на ВМРО-ДПМНЕ „За“ уставните измени гласаа пратениците Владанка Авировиќ, Емилија Александрова, Љубен Арнаудов, Сашо Василевски, Нола Исмајловска, Елизабета Канческа Милеска, Крсто Мукоски и Зеќир Рамчиловиќ.
Собранието со 75 гласа „за“ заклучи најдоцна во рок од 15 дена да изготви предлог амандамни на Уставот и да ги достави до Собранието. Одлуката се објавува во Службен весник и стапува на сила веднаш.