Пратениците по 12 часовна жестока расправа ги избраа новите министри – Хисни Исмаили за култура, Насер Нуредини за животна средина, Горан Милевски за локална самоуправа, Трајан Димковски за земјоделство и Садула Дураки кој направи трансфер во новоформираното министерство за политички систем. Пратениците во текот на целиот ден дискутираа и жестоко се расправаа за предложените министри.
Пратениците од владејачкото мнозинство го бранеа предлогот на Заев за владината реконструкција, додека опозицијата критикуваше дека предложените функционери не се соодветни.
Пратеничката Даниела Рангелова од ВМРО-ДПМНЕ рече дека премиерот направил грешка како мандатар кога најавил голема метла во владата и институциите, со што ги зголемил очекувањата на граѓаните.
Додека Бетијане Китев од СДСМ рече дека пораката на народот од претседателските избори е примена и оти оваа владина реконструкција е одговор на тоа.
На крајот на расправата за избор на новите министри Заев рече дека биле кажани многу невистини од говорницата, промените беа најавени и се случуваат.
„Имаше членови на мојата партија кои се оденесуваат како локални шерифи односно немаат слух за граѓаните. Предложивме промени на 7 луѓе, следуваат промени во заменички места и директори и тн. Убеден сум дека декември имаме шанси да станеме членка на НАТО. Убеден сум дека ќе ги и отвориме поглавјата 23 и 24 до крај на годината. Мојата амбиција да раководам со министерството за финансии не е да потпишувам туку да ги максимизирам моите одговорности кои треба да донесат бенефит за сите граѓани.“, потенцира Заев.