Министерството за здравство ќе предложи изменa на Законот за здравствена заштита со која ќе се ограничи цената на лекувањето на болните од Ковид – 19 во приватните клиники. Министерот за здравство Венко Филипче најави дека предлог – измената на Законот за здравствена заштита утре ќе ја достави до Владата.
„Се донесе одлука да се направи измена во Законот за здравствена заштита со која на приватните болници ќе се ограничи висината на наплата на финансиски средства за времетраење на кризната или вонредна состојба, а се однесува конкретно на лекување ковид – пациенти. Го слушнавме апелот на граѓаните, сепак е криза, има потреба да се користи и тој болнички капацитет“, рече министерот Филипче.
Минатата недела, на барање на министерот Филипче, цените за лекување пациенти болни од Ковид – 19 за десет отсто ги намали Клиниката „Жан Митрев“ и формираше посебни пакети со намалени цени. Клиниката „Аџибадем Систина“ каде што исто така се лекуваат ковид-пациенти, се изјасни дека намалување на цените за нив нема економска логика.