Покачено ниво на ПМ10 честичките или загаден воздух од утрово има низ Скопје. Според мерните станици и апликацијата „Мој воздух“, најголема е загаденоста во сите места помеѓу Ново Лисиче и Центар. Најмала пак, од Карпош до Ѓорче Петров.
Негодување за состојбата со воздухот уште пред да дојде зимата има и на социјалните мрежи. Граѓаните посочуваат дека воздухот веќе почна да мириса на чад и дека надвор не се дише.
Според „Мој воздух“, мерните станици во Гази Баба, Кисела Вода (11 Октомври), Маџир Маало, Клинички центар, Центар 2, покажуваат дека воздухот е загаден. Индексот за квалитетот на воздухот покажува дека вредностите се движат од 35 до 50. Односно, лолку е повисока мерката, толку е позагаден воздухот според бар еден од сензорите на станицата.
Делумна загаденост, има според мерните станици во Аеродром, Ново Лисиче, Автокоманда, Црниче, Центар (близу булеварот Партизански Одреди и булеварот Мајка Тереза), Градскиот парк, Карпош 4.
Чист воздух се регистрира во Ѓорче Петров, Карпош 3, Карпош 1, Козле, Железара, Топанско поле, Бардовци, Сопиште.