28-годишен скопјанец е под постапка во Обвинителството, откако е осомничен дека уценувал 32-годишна жена од скопско чии компромомитирачки снимки и фотографии поседувал. Тој ѝ барал 1.500 евра, заканувајќи се дека во спротивно ќе ги објави, според Обвинителството.
„Осомничениот 28-годишник, во периодот од 21 до 31 јануари, преку мобилната апликација Вибер, побарал од една оштетена да му даде 1.500 евра за да не објави нејзини фотографии и видео клипови со компромитирачка содржина. На 31 јануари, по претходен договор, се сретнале со оштетената во кафе бар на плоштадот „Македонија“, каде таа му предала парични средства во износ од 30.750 денари, односно 500 евра во денарска противвредност. Веднаш по преземањето на парите осомничениот бил приведен,“ информираат од ОЈО Скопје.
Надлежниот јавен обвинител, бидејќи постојат околности кои укажуваат дека постои опасност од бегство, до судијата на претходна постапка од Основниот кривичен суд Скопје достави предлог за определување мерка притвор.