Основното јавно обвинителство бара притвор за скопјанец кој ја претепал својата сопруга, а нејзината тригодишна ќерка ја мавал со дрвен предмет, ја гризел и ѝ ги ставал рацете на шпоретот.
Обвинителството го сомничи насилникот за тешка телесна повреда и запуштање и малтретирање дете.
Од обвинителството соопштуваат дека осомничениот, на 7 јануари, во домот на ул. „Вашингтонска“ во Скопје, тешко телесно повредил жена со која живеел во вонбрачна заедница. По претходна вербална расправија, тој почнал да ја удира со тупаници во пределот на лицето, а потоа со тврд предмет – парче дрво замавнал и ја удрил по главата и телото. Потоа насилно ја турнал жената на подот и продолжил со клоци да ја удира по стомакот, нанесувајќи ѝ тешки телесни повреди.
„Додека оштетената се обидела да повика помош, тој се приближил кон нејзината 3-годишна ќерка и со грубо запоставување на својата должност за грижа и воспитување како очув, започнал да ја удира со дрвен предмет по телото, да ја гризе и да и ги става рацете на шпоретот, со што и нанел тешки телесни повреди“, се вели во соопштението.
Со оглед на тоа надлежниот јавен обвинител утврди дека се исполнети законските основи, до судијата на претходна постапка при Основниот кривичен суд Скопје доставен е предлог за определување мерка притвор за осомниченото лице.