Министерството за здравство и Светската здравствена организација (СЗО) денеска во Градскиот парк 2 во Скопје ќе реализираат симулациска вежба „Сообраќајна несреќа со голем број повредени и со изгореници”, дел од активностите кои се однесуваат на подготовка и одговор при кризни состојби.
Целта на вежбата е тестирање на Планот за одговор при кризни состојби на ЈЗУ Градска Општа Болница 8-ми Септември-Скопје, и подготвеноста на Итните медицински служби при Здравствен дом -Скопје како и соработката со другите сектори.
Во нејзина реализација ќе учествуваат шест екипи на Итните медицински служби Здравствен дом-Скопје, Црвениот крст на Република Македонија, ЈЗУ ГОБ 8-ми Септември-Скопје, Министерството за внатрешни работи, Бригадата за противпожарна заштита-Скопје. вежбата се организира во соработка со Град Скопје, Центарот за управување со кризи и Дирекцијата за заштита и спасување.
Симулациската вежба ќе се реализира како дел од Меѓународната конференција за безбедност на сообраќајот на патиштата во организација на РСБСП. Вежбата е дел од активностите планирани во рамките на Двогодишниот билатерален договор за соработка за 2014/2015 година помеѓу Министерството за здравство и Светската здравствена организација (СЗО).
