Однесувањето на градежните конструкции при дејство на инцидентни влијанија и природни катастрофи како: земјотреси, екстремно високи и ниски температури, пожари, ветер, експлозии, поплави, лавини, одрони, се во фокусот на 17. симпозиум на Друштвото на градежни конструктори на Македонија (ДГКМ), што ќе се одржи од денеска до 7 октомври во Охрид.
Учесниците на симпозиумот, градежни конструктори, студенти и истражувачи од сродни области, ќе разменуваат знаења и идеи за најновите научни достигнувања и практики и ќе постават насоки за идни истражувања и соработки во областа на градежништвото.
Во соработка со Комората на овластени архитекти и овластени инженери ќе се одржи тркалезна маса на тема „ Законот за градење и потребите од негови измени и дополнувања“. Најавена е и дебата за
„Имплементација на Регулативата за градежни производи – CPR 305
– 2011“ во соработка со Европскиот комитет за стандардизација – CEN.
На отворањето на симпозиумот ќе се обрати министерот за транспорт и врски Горан Сугарески.
