Колку вреди човечкиот живот во Македонија? Се фрлаат милионски суми за луксузни барокни згради, милионски споменици и панорамски тркала, а за стотина пати помали суми кои се потребни за спас на многу животи, се одолговлекуваат процедурите, се бара огромна документација и уште многу други бирократски пречки, од кои најголемата се парите што државата е должна да им ги даде на луѓето кои бараат помош.
Дали палмите се повредни од човечкиот живот? Дали откажувањето на власта од едно панорамско тркало што чини 18 милиони евра може да им даде надеж и спас на сите кои молат за помош.
По трагичната смрт на Тамара од Велес, се чинеше дека државата ќе биде поангажирана ако ништо друго да им даде шанса на сите болни на кои им се потребни пари за лекување во странство, но тоа не се случи.
Освен што згасна уште еден млад живот, со месеци наназад како што може да се види на страницата донации.мк, истите луѓе не успеваат да ја соберат потребната сума за лекување, а државата не реагира.
Еден од нив беше и битолчанецот Пеце Роговски, кој успеа сам со добрината на други луѓе да ги собере потребните пари – но беше премногу доцна. Што е функцијата на оваа држава-да се грижи за граѓаните и нивните потреби или пак за мегаломанските проекти за кои се смее целиот свет?