Швајцарската Фондација „Здрави и среќни деца“ денеска донираше кујнска опрема за учениците со посебни потреби во државното средно училиште (ДСУ) „Искра“ во Штип. Директорот на ДСУ Марјан Арсовски вели дека станува збор за донација вредна околу 8.000 евра.
– Како што споменав оваа донација е во вредност од 8.000 евра и станува збор пред се за инвентар, апарати и машини за кујнска опрема, а тоа се за во кујната и трепезаријата во ДСУ „Искра“ од Штип, вели Арсовски.
Советникот за информирање во Кабинетот на градоначалникот на Општина Штип, Кристина Костова вели дека станува збор за вредна донација од швајцарската фондација, а во тек се и разговори и за нова донација за истото училиште. Станува збор за реконструкција на кровот на училиштето.
– Таа би требало да изнесува некаде околу 55.000 евра, за тоа се разговара и со Министерството за образование, како што сме информирани и тоа би било навистина суштински важна донација, заради тоа што ќе се однесува за реконструкција на кровот, вели Костова.
При денешното врачување на донацијата присуствуваа и претставници од фондација „Здрави и среќни деца“, меѓу кои и Томас Локфол.
– Ова е прв наш проект со директорот на училиштето, а целта ни е да помогнеме на учениците и се надевам дека со опремата ќе се служат во наредните неколку години, вели Локфол.
Инаку во ДСУ „Искра“ се едуцираат, но и во интернатскиот дел се сместени ученици со посебни потреби од повеќе градови во земјава, а кои добиваат соодветно образование согласно наставните програми.