Универзитетот „Гоце Делчев“-Штип повторно е второрангиран државен универзитет во Македонија. Академското рангирање на универзитетите во Република Македонија е објавено синоќа од Центарот за светски универзитети при Шангајскиот универзитет Џао Тонг.
Ректорот на УГД-Штип Блажо Боев изјави дека и покрај тоа што универзитетот постои само 10 години, ова докажува дека е респектибилна високообразовна институција.
– Се наоѓаме на второ место во Република Македонија, веднаш по државниот универзитет „Свети Кирил и Методиј“ во Скопје, што е и нормално да биде така, бидејќи тоа е универзитет кој постои 70 години. Меѓутоа, сепак за еден десетгодишен период, една млада установа да се справи со сите свои породилни болки и маки и да е силно позициониран на второто место меѓу универзитетите во Република Македонија, мислам дека е нешто што треба да се респектира, рече Боев.
Тој истакна дека Штипскиот универзиртет во изминатите десет години со својот наставен кадар и студенти се развива, но и придонесува во истражувањата, соработката со стопанството, меѓународната заедница и универзитетите во светот.