Штипското комунално претпријатие „Исар“ обезбеди 100 нови контејнери, кои ќе бидат поставени во централно подрачје и во штипските населби. Директорот на ЈП „Исар“, Ангел Бојаџиев вели дека вкупната вредност на новите пластични контејнери е 14.000 евра.
-Овие 100 контејнери ќе бидат поставени во центарот, населбата 8 ми Ноември, улицата „Партизанска“. Значи старите контејнери кои ќе ги извадиме ќе бидат репарирани и исчистени, дезинфецирани и ќе бидат поставени таму, каде што има недостиг од контејнери, вели Бојаџиев.
Градоначалникот на Општина Штип, Илчо Захариев вели дека штипското комунално претпријатие „Исар“ вредно работи на терен, а благодарение на транспарентните јавни набавки претпријатие штеди и обезбедува нови контејнери, а се инвестира и во сите останати работни единици. Забележува дека покрај инвестициите во Комунална хигиена, во текот на наредните денови ќе работат и на уредување на новиот дел од градските гробишта.
-Ние тука нема да застанеме наскоро во рамките на нашите активности ќе ги уредуваме и гробиштата во Штип и најверојатно деновиве ќе почнеме и со асфалтирање на патиштата во новите гробишта во Штип, вели Захариев.
Тој додава дека граѓаните треба да се грижат и да не ги оштетуваат новите контејнери, а доколку има не фрлен отпад веднаш да се јават во ЈП „Исар“.