Преку бесплатни обуки од областа на финансиите, менаџментот и маркетингот, Општина Штип ќе се обиде од штипјани да направи успешни претприемачи. Станува збор за проект што Општината го реализира во соработката со Економскиот факултет при Универзитетот „Гоце Делчев“ во Штип, а ќе трае во следниве два месеци.
„Проектот ‘Бесплатни обуки за теоретски и практични знаења и вештини на претприемачи од областа на финансиите, менаџментот и маркетингот’ има цел да обезбеди развој на претприемништвото како на локално така и на национално ниво. Учесниците ќе имаат можност да научат одредени менаџмент-алатки, кои ќе им помогнат да започнат нов бизнис или да го унапредат веќе постојниот, како и правната регулатива поврзана со основање и функционирање на трговските друштва“, изјави Тамара Јованов – Марјанова, професор на економскиот факултет на УГД.
Од вкупно 60 пријавени на конкурсот што општината го распиша пред 10 дена, избрани се 30 лица на возраст од 18 до 40 години. Според Јованов-Марјанова условите за избор биле старосната граница, степенот на образованието, како и познавањето странски јазици.
Од општината велат дека ваквиот проект е основа за создавање на „бизнис-инкубаторот“, но и за основање на консултантска канцеларија, која наскоро треба да биде отворена во рамки на општината.
Ова е втор проект на општината во изминативе три години кој има цел да им овозможи поголема конкурентност на граѓаните на пазарот на трудот. Преку првиот проект штипјани имаа можност бесплатно да ги изучуваат странските јазици.
М.Р.