Штипјанецот Д.И. (28), кој на 17 јули беше пронајден претепан и во бесознание на само неколку метри од неговиот дом, бил жртва на платено убиство нарачано од неговиот чичко.
Полициската истрага покажала дека критичната ноќ, на 17 јули, Г.Д. (27) од Штип го пречекал Д.И. пред гаражата од неговата семејна куќа лоцирана на ул „25 мај„ во Штип со намера да го лиши од живо, а за тоа да добие паричен надоместок од П.В. (62), исто така од Штип.
Од зад грб, со тврд предмет, го удрил во пределот на главата, а кога Д.И. се обидел да избега, го стигнал, го турнал на земјата и продолжил со ударите по главата, по телото и по нозете, сè додека не бил прекинат од реакцијата на околните соседи, кои вознемирни и исплашени од настанот излегле на терасите од своите куќи.
Според истрагата, најверојатно мотивот за нарачаното убиство се нерасчитените имотно-правни односи што ги имале таткото на жртвата и П.В.
Поради тежината на повредите, младиот Д.И. беше пренесен на лекување во Државната болница во Скопје.
Врз основа на сознанијата од истрагата, СВР Штип денес поднесе кривична пријава против Г.Д., како првообвинет ,за кривично дело „убиство во обид поради користољубие“ и П.В., како второобвинет, за делото „потикнување на вршење на кривично дело убиство“.
Првобвинетиот е во бегство, додека, пак, на второобвинетиот веќе му е изречена мерка 30-дневен притвор од страна на истражниот судија.
М.Р.