Со пригоден говор и положување нсвежо цвеќе пред бистата, штипскиот огранок на Сојузот на борците од НОБ ја одбележа 26-годишнината од смртта на народниот херој генерал Михајло Апостолски.
„На денешен ден пред 26 години згасна животот на генерал Михајло Апостолски. Генералот Апостолски е легендарна личност со која се поврзани и сите историски моменти од народното ослободување, па сè до неговата смрт, бидејќи тој извршувал најразлични функции. Како генерал и како врховен командант на генералштабот на Македонската армија, тој ги водел партизаните низ многу битки, а највозвишено е неговото дејствување за време на февруарскиот поход, кое е опеано и во голем број епопеи“, изјави претседателот на штипскиот огранок на Сојузот на борците од НОБ, Трендафил Атанасовски.
На свеченоста присуствуваше и делегација од Општина Штип, предводена од градоначалникот Илчо Захариев, како и претставници на двете најголеми политички партии.
Генерал Михајло Апостолски е роден во Ново Село, Штипско 1906 година. Тој е командант на Главниот штаб на Народноослободителната војска и Партизанските одреди на Македонија за време на Втората светска војна и претседател на МАНУ во два мандата.
М.Р.