Се отстрани и единствената пречка за изградба на новата детска градинка во штипската населба „Сењак“. Градоначалникот на Општина Штип, Благој Бочварски денеска информираше дека на вчерашната владина седница донесена е одлука Општина Штип на трајно користење да го добие градежното земјиште за изградба на детска градинка.
– Ова е уште еден чекор во насока на изградба на еден од најголемите капитални проекти којшто го ветивме во предизборната кампања и со кој посебно се гордееме. Токму затоа ја информирам јавноста дека се работи за парцела од 5.518 м2 каде што ќе се изгради градинка за околу 200 дечиња. Наредниот чекор е да ги добиеме средствата кои се веќе изгласани на источен плански регион од околу 16 милиони денари, а Општина Штип ќе го покрие остатокот од својот буџет, со нешто повеќе од 20 милиони денари, рече Бочварски.
Тој очекува во текот на наредниот месец и Бирото за рамномерен регионален развој да ја донесе одлуката за доделување на средства за изградба на детската градинка во населбата Сењак, а со што ќе може и да почнат со тендерските постапки за избор на изведувач на градежните работи. Со изградбата на детската градинка во населбата „Сењак“ ќе се намали и бројот на дечиња, кои се ставени на листа за чекање за прием во двете детски градинки и во нивните клонови низ населбите во Штип.