Праските и кајсиите се најпогодени од пролетните ниски температури што го зафатија Тиквешко при крајот на април, но штети има и кај младите ластари од лозовите насади.
Според првичните сознанија од терен, штети се евидентирани на помали површини, во локални подрачја како селата Паликура, Сопот, Фариш и Моклиште кои биле зафатени од студените струи.
– Штети има и кај некои сорти од грчката слива. Бадемите кои неколку години наназад трпеа последици од мрзнење, сега не се погодени од ниските пролетни температури, а штети нема и кај крушите и јаболките. Оштетувањата зависеа, пред се, од местоположбата и сортите, вели инженерот агроном, м-р Диме Златев.
Златев додава дека најмногу последици од пролетните ниски температури ќе има во т.н. депресивни места.
Во врска со повикот на општина Кавадарци до земјоделците кои треба да пријават доколку претрпеле штета, градоначалникот Александар Панов изјави дека во некои села штетите се максимални.
– Од жителите на селата Фариш и Раец бев информиран дека за време на ниските пролетни температури претрпеле штети од мрзнење кај земјоделските култури. Според нивното кажување, тоа оштетување на некои места било и стопроцентно. Стапив во контакт со надлежните во ресорното Министерство за земјоделство, шумарство и водостопанство. Одлучивме да објавиме повик на кој ќе се јават сите кои претрпеле штети, информира Панов.
Согласно штетите, нагласи, треба да се очекува и обесштетување.
– Ова е вообичаена постапка кога има елементарна непогода. Анализите на терен ќе ги дадат точните податоци за тоа колкави се навистина штетите. Но, ние ја разбиравме грижата на земјоделците бидејќи голем дел од нив живеат од дејноста. Затоа и го објавивме повикот, напомена градоначалникот.