Во касарната „Илинден“ во Скопје, во организација на Генералштабот на АРМ, денеска ќе се одржи шестото првенство на АРМ во крос-кантри трчање.
Првенството свечено ќе го отвори заменикот на началникот на Генералштабот на АРМ генерал-мајор Насер Сејдини, а кросот е предвидено да се одржи на посебно уредена патека во касарната „Илинден“ на 10 км во машка и на 5 км во женска конкуренција. На шестото првенство во крос-кантри ќе учествуваат натпреварувачи од сите команди и единици на АРМ, Воената Академија и Атлетската Федерација на Македонија.
Атлетската дисциплина во крос-кантри трчање, во АРМ редовно се одржува во последниве неколку години, што придонесе постигнување на забележителни спортски резултати во атлетиката, како на учеството на меѓународните атлетски воени првенства, така и на атлетските натпреварувања во Македонија.
На шестото првенство во крос-кантри, се очекува масовно учество на припадниците на АРМ, со што уште еднаш ќе се демонстрира важноста на изградбата на физичката кондиција и спортскиот дух како неопходни фактори за здрав живот и успешно извршување на задачите кај припадниците на АРМ.
