Заменик претседателот на СДСМ, Радмила Шеќеринска во нтервју за Радио Слободна Европа, вели дека сметаат дека во моментов за Македонија компромис е подобар и за нејзината национална посебност и за нејзината иднина и за интеграциите и граѓаните на земјата. Но, тоа решение вели, не смее да го загрози националниот идентитет и интереси.
СДСМ како власт ќе најде начин Македонија да ги почне преговорите со ЕУ, вели Шеќеринска .
„ВМРО-ДПМНЕ покажува дека партиските интереси им се многу побитни од државните интереси. Спорот со Грција за името го претворија во чадор со кој се бранат од какви било објективни критики за сè“, одговара Шеќеринска.
Денеска, вели, граѓаните живеат во страв дека ако се на спротивната страна или ако ги искритикуваат владините политики, дека некој ќе смета дека тие се државни непријатели.
Денеска граѓаните се во страв дали Македонија ќе преживее како држава во регионот кој оди напред, а таа стагнира и на патот кон ЕУ и на патот кон НАТО.
„Она што СДСМ мора да го понуди, тоа е ослободување од овие стравови. Се разбира дека тоа не е доволно. Во Македонија слободите се почеток. Очекуваат граѓаните и понуда на економски и понуда на социјален план, меѓутоа мислам дека без овој прв чекор ништо понатаму не е доволно. Мислам дека СДСМ мора да понуди повеќе алтернативи на сите различни структури и сите типови на граѓани во македонската држава“, вели заменик претседателот на СДСМ.