Одлуката на Европската унија повторно да го одложи носењето одлука за отворање на преговорите за членство на Македонија е за сериозна критика и целиот процес на проширување може да се прекине доколку биде забавен или запрен, предупреди американскиот аналитичар и поранешен мировен пратеник на Балканот, Даниел Сервер.
Според него, Времената спогодба од 1995 година останува најдобро решение за спорот меѓу Грција и Македонија.
– Начинот на носење одлуки во ЕУ е налудничаво бавен, но таа сепак успеа да ги смири воинствените духови. Но, овој успех не мора да трае, аналогијата со велосипедот кој мора да се движи напред за да не падне важи на Балканот, кој не тоне во насилство поради неговото движење напред. Одложувањето на одлуката од ЕУ ќе создаде националистички тенденции во Македонија, ќе ги заостри односите со големото албанско малцинство и дополнително ќе ги наруши односите со Грција и Бугарија. Ако ги игнорираме луѓето само затоа што не применуваат насилство, може да се случи да научат погрешна лекција – вели Сервер.