Во Дневниот центар за деца со посебни потреби во Гевгелија денеска ќе биде промовиран проектот „Програма за целосна социјализација на деца со посебни потреби во нивните заедници“.
Проектот е финансиран од Европската унија, а ќе го спроведуваат Фондацијата „Аполонија“ и Македонското научно здружение за аутизам.
Програмата ќе ја промовираат претседателот на УО на Фондацијата „Аполонија“ Марија Клинг, градоначалникот на Општина Гевгелија Иван Франгов, сопругата на претседателот Маја Иванова и шефот на Делегацијата на ЕУ Аиво Орав.
По промоцијата ќе бидат отворени терапевтска соба во Дневниот центар за деца со посебни потреби во Гевгелија и сензорните соба во ООУ „Петар Мусев“ во Богданци, ООУ „Кочо Рацин“ во Нов Дојран и во ООУ „Јосип Броз Тито“ во Валандово.
Овие соби се наменети за индивидуална работа и третман и со децата со посебни потреби од четири општини од Југоисточниот регион: Гевгелија, Дојран, Валандово и Богданци, кои ќе работат во склоп на училиштата како дополнителен сегмент на наставниот процес, создавајќи подобри услови за инклузија на децата со посебни потреби. Сензорните соби и терапевстската соба ќе бидат отворени и за време на летниот период.
Проектот е финансиран преку Европскиот инструмент за демократија и човекови права со 77.000 евра. Целта е да се зголеми социјалната интеграција и развојот на децата со посебни потреби.