Седницата за уставните измени, која беше закажана за денеска, по неколку обиди и презакажувања не успеа да се одржи.
Претседателот на Собранието, Талат Џафери, потврди дека е презакажана за утре на пладне.
Во меѓувреме премиерот Зоран Заев ќе продолжи со координативните состаноци со Беса на Билал Касами и пратеничката осумка независна од ВМРО-ДПМНЕ.
Неофицијално, се остава простор за уште еден обид за постигнување договор на премиерот Заев со Беса на Касами откако претпладнево не успеале да најдат решение за прецизна формулација на државјанството, како што бараат од оваа албанска опозициска партија.
Неофицијално еден од предлозите околу кои се обидувале да се договорат е наместо терминот „македонско“ во документите на албански јазик да пишува „од Македонија/ граѓанин на Република Северна Македонија“, по инсистирањето на Беса на Касами да се разграничи државјанството од етничката припадност. Со овој предлог неофицијално би се интервенриало во уставниот закон, но тоа не било прифатливо за пратеничката осумка независна од ВМРО-ДПМНЕ и коалицијата.
Габриела Димковиќ-Мишевска