Жителите на штипската населба Сењак и двете јавни претпријатија „Стипион“ и „Исар“ од денеска почнаа со тридневна акција за расчистување на отпадот, кастрење на дрвјата, како и обележување на улиците и пешачките премини.
Директорот на ЈП „Стипион“, Сашко Протогеров вели дека во оваа населба ќе се заменат и уличните светилки.
– Акцијата ќе трае три дена, од вторник до четврток. Ги замолуваме граѓаните, со нивните сугестии и барања да се обратат до јавните претпријатија со цел доколку сме во можност да ги исполниме нивните барања, вели Протогеров.
Тој додава дека граѓаните, кои имаат стар мебел или ги чистат своите подруми да го оставаат отпадот на обележаните места, со цел побрзо и да се транспортира до Градската депонија.
Во останатите населби во градот Штип, исто така ќе се спроведат пролетни акции за расчистување на отпадот, кастрење на дрвјата и обележување на улиците и пешачките премини.