СВР Велес превзема мерки за пронаоѓање на 82 годишната М.А од село Бистрица, општина Чашка, чија куќа целосно изгоре во пожар на 5 февруари вечерта околу 22 часот.
Како што информира денеска портпаролот на СВР Велес, Биљана Ѓаковска, на местото на настанот вечерта на 5 февруари во селото Бистрица, излегле јавен обвинител и увидна екипа од СВР Велес, по што полициски службеници и екипа на Јавно комунално претпријатие „Тополка“ на Општина Чашка неколку денови вршеле и пребарување во куќата, но не било пронајдено човечко тело. Поради тоа, вчера попладне во 14.00 часот во СВР Велес, нејзиниот внук 53 годишниот О.М. од Велес ја пријавил како исчезната.
Од СВР Велес денеска појаснуваат дека се преземаат мерки за пронаоѓање на лицето.
Тие потсетуваат дека на 05. февруари годинава во СВР Велес било пријавено дека околу 22.20 часот во село Бистрица, општина Чашка, настанал пожар во куќа, сопственост на 82 годишната М.А. Куќата била целосно опожарена.
Како што информираат денеска од СВР Велес, пожарот бил изгаснат од екипа на Територијалната Противпожарна Единица Велес, а по кажување на очевидците, сопственичката М.А. последен пат во куќата била видена истиот ден.