Прелеа езерото Мантово соопштија од општина Штип, а поради прелевањето на езерото се излеа и реката Крива Лакавица. Поплавени се земјоделски ниви, а се следи и состојбата со мостот кај селото Балталија на регионалниот пат Штип-Радовиш.
Портпаролот на градоначалникот на општина Штип, Милена Ристова Михајловска вели дека до жителите на селата на лакавичкиот регион и сопствениците на викенд куќите се апелира да не ја преминуваат реката, а стоката да ја евакуираат на повисоки места.
Градоначалникот на Штип, Илчо Захариев веќе е на лице место по што ќе се одлучи какви мерки ќе се преземат за овој регион каде што реката Крива Лакавица се излеала.
Во текот на денот поради обилните врнежи од дожд се зголеми и водостојот на реката Отиња која поминува низ центарот на Штип. Времено се забранети за сообраќај два моста, едниот кај црквата „Свети Никола“ и вториот е камениот мост на реката Отиња.
Директорот на ЈП „Стипион“, Тони Јовев вели дека забраната за движење по мостовите е направено превентивно.
Водостојот во реката Отиња засега не ја достигнува критичната точка.