Општина Илинден информира дека на повеќе локации во тек се интензивни градежни активности во рамки на реализација на Проектот за подобрување на патната инфраструктура-изградба, реконструкција, рехабилитација и санација на локалните улици и патишта.
Комплетно е саниран и асфалтиран дел од улицата „535“ во населба Илинден, во должина од 280 метри. Оваа улица се протега од новиот пешачки мост и ја поврзува улицата „8“ во населба Илинден и улицата „500“ во Марино со општинското основно училиште „Гоце Делчев“, Средното општинско стручно училиште „Илинден“, градинката „Гоце Делчев“ и е од посебно голема важност за безбедноста на граѓаните, особено за учениците.
Општина Илинден соопшти дека во локалната економска зона Марино-Кадино во тек е изградба на новопроектираната улица „2“ во должина од 230 метри. Кон оваа улица гравитираат повеќе стопански објекти кои преку неа се поврзуваат со локалниот пат Марино-Кадино. Во моментот се работи на поставување фекална канализација и тротоари, по што ќе следува асфалтирање.