За два часа се очекува големо надоаѓање на река Брегалница во Штип. Се очекува да бидат поплавени три населби, 8-ми Ноември, Чардаклија и Ново село.
Моментално загрижувачка е состојбата со браната Калиманци каде што во моментов се излеваат 50 метри кубни вода во секунда.
Во моментот во Штип заседава државниот кризен штаб. Министерот за транспорт и врски Миле Јанакиески, сите градоначалници од источниот регион, како и директорите на јавните претпријатија на истокот прават план и стратегија за справување со ситуацијата.
Во секој момент се очекува премиерот Никола Груевски да пристигне во Штип.
Градоначалникот Илчо Захариев ги повика граѓаните да излезат и да се вклучат во правењето насипи.
„Од обилните врнежи на дожд кои траеја во текот на целата ноќ, повторно пред излевање е браната Мантово. Водостојот е на критично ниво и веќе постои опасност од прелевање. Сите жители на Лакавичкиот регион да бидат внимателни и да го следат водостојот на Лакавичка река, чие ниво се очекува да порасне. Жителите да ги заштитат имотите и стоката“, наведено е во соопштението на општината Штип.
Извор: Мета