Постои реална опасност пробиениот дел од браната на Липска Река кај селото Липа, Неготинско, целосно да попушти, што може да предизвика катастрофални последици, човечки жртви и поплава врз околните земјоделски површини, предупредува техничкиот директор во водостопанство „Тиквеш“ Илија Темелковски.
Поради тоа што дел од водата веќе почнала да се излева, тој предлага прво да се прошири и прочисти десниот одводен канал, а потоа да се санира огромната дупка на средина од насипот.
Во Липа, кое е иселено село, за опасноста од оштетувањата на браната утрово алармираше единствениот постојан жител, Јован Ѓелов.
Причина за напукнување на средниот дел на браната се неодамнешните поројни дождови.
