Градоначалникот на Струмица, Коста Јаневски, дел од членовите на Советот и екипи на ЈПКД „Комуналец“ денеска ја чистеа дивата депонија на патот Струмица-Валандово, кај селото Костурино.
Акцијата за чистење е во рамки на кампањата што ја иницираше раководството на ЗЕЛС и се реализира во сите општини во државата.
Градоначалникот Јаневски истакна дека акцијата е продолжување на претходните кои се реализираа во општината.
– Апелирам до сите наши сограѓани да внимаваат каде го фрлаат отпадот. Во овој период многу внимателно ќе се набљлудува каде се врши фрлањето, но и инспекциските служби ќе се на терен и не би сакал да доаѓаме во непријатни ситуации да се изрекуваат казни. Сметам дека чистотата, зеленилото и уредениот град се наши приоритети, рече градиначалникот Коста Јаневски.
Од ЈПКД „Комуналец“ појаснуваат дека избраната локација за чистење е поради сздавање навика кај локалното население организирано да се изнесува и собира ѓубрето.
– Пред извесен период во населеното место Костурино почнавме со пробно собирање на сметот од домаќинствата и тоа два пати неделно. Целта е граѓаните да се стекнат со навика да го инесуваат сметот, а ние да го собираме. Затоа избравме заедно со општината да ја чистиме оваа депонија и се надевам дека во наредниот период нема повеќе тука да ги фрлаат ѓубрето и сметот, рече Зоран Горгиев, директор на ЈПКД „Комуналец“.
Тој додаде дека акцијата за чистење во општина Струмица ќе трае во текот на целиот месец.